غزل
علی ارمانؔ
اپنی آنکھوں میں دکھا کر کسی طغیانی کو
ٹھنڈا کرتا ہوں رعونت سے بھرے پانی کو
سوچتے سوچتے میں ہو گیا پتھر اک دن
کون چھڑوائے گا آئینے سے حیرانی کو
مجھے معلوم ہے اوقات نہیں صحرا کی
جتنا ویران میں رکھ سکتا ہوں ویرانی کو
پہلے طوفان اٹھاؤں گا ترے دریا میں
اور پھر شانت کروں گا میں ترے پانی کو
ابھی مصروف ہوں اک خطہءِ خُود یافتی میں
لُطف لینے دو ابھی میری گراں جانی کو
ریت صحرا کی نہیں بیٹھنے دی زندگی بھر
سَیل اُٹھ کر نہ ملے کیوں ترے سیلانی کو
تمھیں خوش رہنے کا نسخہ میں بتا دیتا ہوں
اتنی مشکل سے نہ بانٹا کرو آسانی کو
دستِ یزداں کی مہک آتی ہے اس مٹی سے
پیار سے دیکھا کرو صورتِ انسانی کو
سخت بارش میں کسی چھت پہ کہیں آخرِشب
دھوپ نے بوسہ دیا تھا مری پیشانی کو
مجھ کو ہر چیز میسر ہے مرے حجرے میں
غور سے دیکھو مری بے سروسامانی کو
اتنا صیقل کیا ارمان سخن کو میں نے
میر و غالب بھی چھپاتے پھرے حیرانی کو
