کرتا ہوں میں نہ مجھ سے ریاکاری ہوتی ہے
رندانِ باصفا میں یہ بیماری ہوتی ہے
صحرا کے مدرسے میں فقط قیس ہی نہیں
میرے بھی دستخط سے سند جاری ہوتی ہے
ہوتا نہیں خراب ہراک دشت میں وُہ شخص
جس کو تلاشِ آہوئے تاتاری ہوتی ہے
سورج نکلتا ہے مری ہرایک پور میں
جب شامِ زلفِ سیم تناں طاری ہوتی ہے
تُو اشکباری دیکھنے آیا ہے بیٹھ جا
اور دیکھ کیسے آنکھ سے خوں باری ہوتی ہے
شامِ سبو کے سامنے کھُلتا ہے میرا پول
دن بھر تو قہقہوں کی اداکاری ہوتی ہے
یہ بوجھ لو کا ہے کہ اندھیرے کا، جو بھی ہو
جلتے دیوں پہ رات بہت بھاری ہوتی ہے
تفصیل اس لڑائی کی مجھ سے نہ پوچھیے
ہر روز میری شام سے منہ ماری ہوتی ہے
ارمانؔ بیدلی کا نہیں ہے کوئی علاج
بیزاری سے بھی اب مجھے بیزاری ہوتی ہے
