چراغِ منبر و محراب مار ڈالے گا

غزل
تمام انجم و مہتاب مار ڈالے گا
وُہ آنکھیں بانٹے گا اور خواب مار ڈالے گا
بھنور، سراب، بگولے،چراغ، پھول، ہوا
مجھے یہ حلقہءِ احباب مار ڈالے گا
بچا کے دھوپ سے جن کو جوان ہم نے کیا
اب ان درختوں کو سیلاب مار ڈالے گا
تم آ تو جاؤ گے لیکن تمھارے آنے تک
مجھے مرا دلِ بیتاب مار ڈالے گا
کسی کو نیند کے پانی میں موت آئے گی
کسی کو دیدہ ءِ بے خواب مار ڈالے گا
کسی امید نے لٹنا ہے دل کے ساحل پر
کسی سفینے کو گرداب مار ڈالے گا
فلک پہ چاند کو کچھ ابر مار ڈالیں گے
اور اس کے عکس کو تالاب مار ڈالے گا
ہمارے روح میں رَم کر رہا ہے جو آہو
اسے یہ خطہءِ شاداب مار ڈالے گا
ہمیں امید ہے اک دن ہمارا شوقِ سفر
ہماری خواہشِ اسباب مار ڈالے گا

کتابِ کن میں جو ہم بابِ ہجر لکھ رہے ہیں
ہمیں کتاب کا یہ باب مارڈالے گا
کسی بھی لو نے اگر سراُٹھایا بستی میں
چراغِ منبر و محراب مار ڈالے گا
میں ایک نغمہءِ تجرید ہوں علی ارمانؔ
مجھے تعلّقِ مضراب مار ڈالے گا
Ghazal
Tamaam Anjum-o-Mehtaab Maar Daalay Gaa
Wo Ankhei’n Baantay Ga aur Khaab Maar Daalay Gaa
Bhanwar, Saraab, Bagoolay, Chiraagh, Phool, Hawa
Mujhay Yea Halqa-e-Ehbaab Maar Daalay Gaa
Bacha Kaay Dhoop Saay Jin Ko Jawaan Ham Nay Kia
Ab Un Darakhto’n Ko Sailaab Maar Daalay Gaa
Tum Aa to Jaao Gaay Lekin Tumharay Aanay Tak
Mujhay M’ra Dil-e-Baaytaab Maar Daalay Gaa
Kisi Ko Neend Kaay Paani Mein Maut Aayay Gi
Kisi Ko Deeda-e-Baykhaab Maar Daalay Gaa
Kisi Umeed Naay Lutna Hai Dil Kaay Sahil Per
Kisi Safeenay Ko Sailaab Maar Daalay Gaa
Falak Pe Chaand ko Kuch Abr Maar Dalei’n Gaay
Aur Us Kaay Aks ko Taalab Maar Daalay Gaa
Hamaari Rooh Mei’n Rum Ker Raha Hai Jo Aahoo
Usay Yea Khitta-e-Shadaab Maar Daalay Gaa
Hamei’n Umeed Hai ik Din Hamara Shauq-e-Safar
Hamaari Khahish-e-Asbaab Maar Dalay Gaa
Kitaab-e-Kun Mei’n jo Hum Baab-e-Hijr Likh Rahay Hei’n
Hamei’n Kitaab Ka Yea Baab Maar Dalay Gaa
Kisi Bhi Lau Naay Agar Sar Uthaya Basti Mei’n
Chiragh-e-Minbar-o-Mehraab Maar Daalay Gaa
Mei’n Aik Naghma-e-Tajreed Hoo’n Ali Arman
Mujhay Taaluk-e-Mizraab Maar Dalay Gaa